عدد الرسائل : 4840 العمر : 32 تاريخ التسجيل : 28/04/2008
موضوع: قصة حب في اليونان الثلاثاء يوليو 22, 2008 5:55 am
السلام عليكم ورحمة الله وبركاته
وهذي القصة - - قمت من النوم مفزوعة على صراخ زوجة ابوي ،كانت الساعة 2 وهذا اللي زاد خوفي، طلعت اركض صوب حجرةابوي لقيت مرته حاطه راسها على صدره وتصيح قربت منه شوي شوي وفي عيوني نظرة خوف ،شفته شاحب ومغمض ،التفتت علي مرته وقالت لي:ابوج مات مات مااااااااااات يا حور شلون بعيش بدونك يابوراشد شلون دخلوا اخواني راشد وهيا نفس دخلتي وعلى وجهم نفس النظرة ماقدرت استحمل،رجولي ما تشيلني جلست عالارض ماسكة راسي بالقو احسه بينفجر، أبوي مات اشلون ،عمره 45 مافيه شي ماكان يشتكي من شي وانا احين من لي مالي حد في هالدنيا غيره محد يحبني مثله محد يدلعني ويخاف على مشاعري كثره اااااه ياربي ساعدني ساعدني دموعي ماتنزل احس اني اختنق.
دخل خال اخواني الظاهر راشد اتصل له عشان يقوم بالازم ، اشر لي راشد بعينه عشان ادخل غرفتي لاني كنت قاعدة بلبس النوم، دخلت حجرتي انسدحت عالسرير وانا اتمنى اغمض عيني وافتحها ويكون هالشي كابوس حسيت اني ابي انام مادري ليش يمكن عقلي يوحي لي اني لو رقدت راح ينتهي كل شي من حولي ،واخيرا قدرت اغمض عيني وارقد.
هيا: قومي قومي (بصراخ)يا البليده ياعديمة الاحساس. قمت من النوم متخرعة شالسالفة ، فتحت الباب لقيت هيا اختي لابسه الشيلة والعباة . حور:بسم الله اشصاير اشفيج هيا هيا: انتي غبية ولا تستغبين ابوي الفجر متوفي ماتدرين يعني ان في ناس بيجون يعزونا وان الشغالة مسافرة يعني تعالي ساعديني محد عندي امي في حجرتها منهارة وماتقدر تقوم من السرير. حور: ان شالله بتصل فالضيافة يقومون بالازم والله يخليج بسج صراخ ترى اللي فينا يكفينا.وسكرت الباب في وجهها. هيا:غبية راشد:اشفيج هيا:مافيني شي بس كنت اكلم هالغبية عن ترتيبات العزا تراني متوهجة امي تعبانة وهذي قافلة على عمرها والحريم كل مالهم يزيدون في المجلس وانا ماعرف اشلون اتصرف ،بروحي تعبانه(ودمعت عينها) راشد وهو يحط يده على كتف اخته وعلامات التعب واضحة عليه:لا تشيلين هم الحريم اكيد بقدرون حالتنا وبعدين خالتي ندى راح تجي بعد شوي توني مكلمها. اليوم الرابع لبست عباتي وشيلتي، اليوم لازم اطلع المجلس كفاية ، دموعي نشفت وتعبت ابي اختلط بالناس وانسى شوي مع اني مستحيل انسى. دخلت حور المجلس طبعا لازم تلفت الانظار صوبها لان حور كانت وبدون مبالغة اسم على مسمى كانت تلفت الانتباه ببياضها الناصع الذي لاتشوبه شائبة وعيونها الكبيرة الرمادية وانفها الدقيق وشفايفها المليانه كانت كأنها رسمة ، ملامحها كانت مخلوطة مابين ملامح امها اليونانية وابوها القطري وهذا كان السبب الرئيسي في كره هيا لها لان على الرغم من ان هيا فيها جمال عربي اصيل يظهر في عيونها السود وسمارها الحلو وشعرها الاسود القصير الا انها ما كانت تجي شي عند حور .قاموا الحريم يسلمون عليها ويعزونها بالغالي قعدت حور جنب اختها . هيا:ما شاالله واخيرا شرفتينا بحضورج الكريم اشوف الكل فز لج حور:مب وقته يا هيا اجلي سخافاتج هذي لوقت ثاني. هيا:ان شاالله عمتي أي اوامر ثانية طال عمرج. حور:لا مشكورة ندى(خالة هيا):خليها تولي ياهيا اصلاً هذي ماعندها ذرة احساس قاعدة في حجرتها ماكأنه الامر يعنيها . كانت حور تسمع هالكلام وهي متعودة عليه لان اهل مرت ابوها مايطيقونها ولا اهل ابوها اكيد انتو مستغربين هالكره ...السبب بسييييط جداً. اهل ابوها يكرهونها لان بو راشد من 24سنه تزوج فيكتوريا اليونانية غصباً عنهم وخاصة انها كانت مسيحية فقعدوا لهم قعدة لين ما طفشت المرة وطلبت الطلاق وراحت بلادها .اما اهل مرت ابوه فأكيد راح يكونون في صف بنتهم ام راشد ضد بنت ضرتها. تمت حور قاعدة على الرغم من الكلام الجارح اللي تسمعه ،كانت مرت ابوها موجودة لكنها ماانطقت بكلمه استغربت حور منها ماكانت تحس انها تحب ابوها لهدرجه لان ملامحها كانت متغيرة وباين عليها التعب. دخلت هند صديقة حور في الشغل سلمت عالكل وقعدت عند حور، هند:اشلونج حور ان شاالله احسن اليوم فديتج حور:الحمد لله هند:حور....اممم..ادري انه مب وقته بس ترى المدير قال لي ان انتي مايصير تغيبين اكثر من 3 ايام لان ما صار لج الا فتره بسيطه متوظفه،صدقيني حاولت معاه لكن تدرين انجليزي مايعرف السنع. حور:هه لا عادي هند انا ادري وحاطه هالشي في بالي وعارفته وان شاالله راح اداوم.
قعدت هند ربع ساعة ومشت،وبقت حور وهيا وخالاتها وطبعا فضلت حور تدخل حجرتها على انها تسمع كلام يغث. بعد شهر قامت حور الساعة 6 عشان قبل موعدها المعتاد لان اشد هو اللي راح يوصلهم هي وهيا ،خاصة ان البيت مافيه سايق لان المرحوم كان ضد فكرة وجود رجال غريب في وسط البيت. هيا:يالله عطلتينا ابي الحق عالطابور اذا تأخرت المديرة بتسوي لي سالفة. ام راشد:يالله ياحور اعنبو الكل ناطرج ،ترى ايام الدلع ولت وراحت انسيها . حور وهي نازلة عالدرج:ان شا الله وسوري عالتأخير( وفي نفسها-احين انتي مرت ابوي اللي اعرفها) في السيارة كان الكل ساكت الا هيا حاشرة العالم بهذرتها هيا:اقول راشد يعني انا اذا يبت 70 %في الثانوية ادش جامعة قطر راشد:تقدرين بس جنه موازي وما في لج تخصصات عدله انتي شدي حيلج وان شا الله تجيبين نسبه زينة. هيا: الله يهديك أي اشد حيلي انا لو جبت 70 زين اذا الفصل الاول جايبه65% ايش تتوقع مني حور:مافي شي اسمه مستحيل انتي توكلي على الله وشدي حيلج. هيا:انتي جب محد طلب رايج. راشد(بصوت عالي):هيو احترمي اختج العودة. راشد كان الوحيد اللي يحب حور مع صغر سنه(18)الا انه عقله كبير وعلى الرغم من ان فرق السن بينه وبين اخته 3 سنوات الا انه يعاملها باحترام كبير. اول شي وصلوا حور الشغل وراحوا ،دخلت حور المبنى وتوجهت لمكتبها مباشرة ،كانت حور وايد جد في الشغل ماتعطي حد وجه على الرغم من مضايقات بعض الشباب لها الا انها ما كانت تعبرهم ليين تمللوا منها فما قاموا يضايقونها . ساميه:ازيك يا جميل عامل ايه. حور:الحمد لله. ساميه:طالبتك طلبه قولي تم. حور:تم ساميه:فديتج والله ،ابيج تقعدين معاي اليوم بعد ما يخلص الدوام عندي ملفات متراكمة علي ولازم اسلمها باجر وادري ان محد يرضى يساعدني غيرج حور :ان شاالله ما طلبتي شي بس هذا اللي تبينة اساعد بعد انتهاء الدوام. ساميه:بس هذا حور:خلاص بتصل بخوي يمر ياخذني الساعه 6،يعني من الساعة 3لين 6 انا ملكج ساميه:ممتاز،3 ساعات تكفينا وتزيد ،اخليج عيل .مع السلامة صارت الساعة 3 وانصرفوا كل الموظفين محد تم غير ساميه وحور يشتغلون على هالملفات. ساميه:والله ياحور لاتظنين ان هذا اهمال مني بس والله اجي تعبانه من البيت من اليهال وازعاجهم ومشاكل ابوهم لدرجة اني في اليوم اخلص ملف واحد بس من كثر ما اسرح وافكر. حور:الله يعينج حبيبتي لا والله ادري انه مب اهمال منج ......لحظه كانه تلفوني يرن ... اي هذول المطعم. حور:الو ..عليكم السلام..ايوه بالضبط...البرج الازرق ...خلاص انا طالعة الحين..دقيقة بجيب الغدا وبجي ما فيني شدة ادليه الممرات ساميه:اوكي فديتج حور وهي طالعة التقت واحد من الموظفين كان طالع في وجهها واصطدموا ببعض حور:بسم الله ..اه..اسفة الموظف:اخت حور ؟ اسف والله خير ان شاالله في شي مقعدج لهالحزة حور:لا بس عندي شغل اااه ..اسمحلي شوي ابي أمر الموظف وهو يوسع لها ويطالعها بنظرات غريبة: ان شاالله الساعة5ونص ساميه:اااااه تعبت رقبتي انكسرت حور:تستاهلين عشان تعرفين ليش قالوا لاتؤجل عمل اليوم الى الغد ساميه:حورووووو حور:ههههه اتغشمر اشفيج لازم شوي اغلس عليج عشان الوقت يمر بسرعة ......(حد يطق الباب)......... حور:من؟ الموظف:اخت حور الاهل ناطرينج برا. حور:شنو؟للحين الساعة خمس ونص وانا قلت لراشد يمرني 6 وبعدين الاغرب ليش ما اتصل عالجوال. ساميه:يمكن عنده شغله مستعجله فمن جذي جاج مبكر وبالنسبة للجوال يمكن مافي ارسال..شفتي شلون المحقق كونان يفسر لج كل شي. حور:هههه يمكن مثل ما تقولين ..اوكي عيل فُتِك بعافيه. ساميه:مع السلامة حبيبتي مشكوووووووورة ان شاالله اخدمج في عرسج يااااااارب. حور:بعيد الشر.. ان شاالله الي يكرهوني. ساميه:ههههه يالله مع السلامة. حور :مع السلامة. طلعت حور برا البرج ودورت راشد بس ما لقت سيارته مشت ومشت بس مالقت حد.
تمت حور خمس دقايق تتصل بخوها راشد لكنه ما يرد عليها ،اخر شي طرش لها مسج (انا في المحاضرة) حور:شنو؟عيل من ....ااااااااااااااااه - - - فتحت عيني وانا احس بألم فظيع في راسي، انا وين ؟المكان كله مظلم ،احس اني في سيارة في البر ولا وين اااااااخ ما اقدر استحمل الم راسي شاللي قاعد يصير من اللي ضربني ومن اللي له مصلحة يخطفني بهالطريقة انا عمري ما أذيت احد .. فجأة وقفت السيارة.في هاللحظة طاح قلبي في بطني لما سمعت باب السايق ينفتح وبعده صوت خطوات على الحصى،غمضت عيني وادعيت اني مغمى علي، انفتحت الشنطة الريال:الحلو للحين راقد يا ويللي ليكون ماتت الصوت هذا مألوف احس اني سامعته بس ما اقدر احدد،، احين المهم اشلون اشرد منه ،لازم يغفل عني. وفجأة يشيل الريال حور وهي كاتمه انفاسها من الاحراج لان حجابها طاح عالارض غير طبعا الخوف والرعب من اللي ناوي عليه،تجمعت هالمشاعر كلها في وقت واحد،حست انها لازم تفكر في حل سريع لانها اصلاً مب عارفة بالضبط هو اشناوي عليه،نزلها الريال في مكان وتركها وراح،لما سمعت صوت الباب ينقفل وخطواته برا الحجرة فتحت عيونها. حور:ياويلي شهالمكان ااه راسي مااقدر حتى افتح عيني كان المكان مبين عليه مهجور فيه صناديق واشياء مغبره يبين ان مهجور ،قدرت حور توقف رغم الدوخة اللي حاسة بها،بدت تمشي في المكان شافت دريشه و طلت منها شافت طبيلة(ظلة)وجاتها فكرة انها تنزل منها وبعدين تنط، صحيح راح تتعور بس مب مثل ماتنزل من الطابق الثاني على طول عالأرض ، فتحت حور الدريشة استعداداً للقفز. الريال:تو تو تو لا لا ياحلو راح تعور نفسك انا ما تعبت كل هالتعب عشان تنتحرين،بعدين ما تدرين اللي ينتحر يروح النار. حور وهي تصيح:هاااه هاي انت (طلع الموظف)الله يخليك خلني اطلع ماراح اقول لحد بس خلني اطلع الله يخليك. الريال بعبط:خلاص خلاص راح تتطلعين(غير نظرته وصوته وقرب منها شوي)بس مب قبل لاخذ اللي ابيه. حور:هاه الريال: اللي ابيه يا حور منج شي بسيط خاطري فيه من زمان... فهمتي قصدي انا انسان ولي مشاعر ، كل يوم في الشغل اشوفج واتعذب فارحميني خلاص وجهج عذاب والحين اكتشفت انج بدون حجاب ملاك. مسك حور من كتفها وحاول يسحبها صوبه ،بس حور داست على ريله بالكعب مما زاد عصبيته فمسكها من شعرها وقطها عالصناديق. الريال:كنت احاول اكون لطيف لكن انتي الظاهر ماينفع معاج الطيب. حور:ااااااه قوم عني يالحقير قوم ..قوم ..لا لا كان يحاول ينزع ثيابها ،وفي هالأثناء شافت حور غرشة بيبسي زجاج ،مسكتها وكسرت طرفها ودخلت الطرف المكسور المشرشر في رقبته، بدا الدم ينصب صب من رقبته عليها. الريال: يالكلبه يالحقيرة اشسويتي ااههخخخخ وتم ينتفض وينتفض فتره لين هدا جسمه فجأة. حور وهي تصيح:لا لا ما كان قصدي اذبحك صدقني ..قووووم..قوووووووم ياترى اشراح تسوي حور في هالمصيبة الي طاحت فيها راح نعرف ان شا الله في الجزء الجاي
القلب الابيض جماعيني ولا في الخيال
عدد الرسائل : 4840 العمر : 32 تاريخ التسجيل : 28/04/2008
موضوع: رد: قصة حب في اليونان الثلاثاء يوليو 22, 2008 5:56 am
الجزء الثالث انا اشسويت لا مستحيل انا ذبحت انسان انا حشرة اخاف اذبح،احين شسوي شلون اطلع من هني ... وانا اصلاً وين...؟ طلعت حور من الغرفة وهي مب عارفة شتسوي، افكارها مشتته مابين الجريمة اللي ارتكبتها والمكان اللي هي فيه وشلون تطلع . طلعت برا البيت ولقت السيارة صافة عند الباب وشيلتها عالارض لبستها واتجهت صوب السيارة قعدت في مقعد السايق طالعت وجهها في المنظره كانت علامات الضرب واضحة وبقع الغبار مختلطة بدموعها فكانت بالعربي في حاله يرثى لها. حور (في نفسها):الحمد لله انه مخلي المفتاح في السياره ،لكن اشلون اسوق ،انا خبرتي في السواقه محدودة حدي البر لا و ابوي يتحكم في الجير لكن كانهd يعني انها تمشي خلني اجرب شبخسر انا ضايعة ضايعة لا ناس حولي ولا جوال حتى لو كلمت احد شلون بوصف له المكان اللي انا فيه اااه يالله توكلنا على الله. شغلت حور السياره وحطتها عالd طبعاً خلال السواقه السيارة كانت تنقز وتوقف شوي لكن قدرت تطلع من المكان اللي حسب تقديراتها هو عزبه. كانت حور تمشي شوي شوي وهي مب عارفة وين بتروح يوم شافت الشارع حست بالسعادة ما كانت اتظن في يوم من الأيام ان شوفة الشارع بتسوي فيها هذا كله لكن المكان كان مظلم والساعة10 ونص بالليل. حست حور بتعب شديد خلال السواقة لان الدنيا ليل وما في ليتات في الشارع... حور: صار لي ساعة في السيارة لين متى بمشي جذي وانا مب عارفة وين بروح يمكن هالطريق كل ماله يبعدني عن الدوحة للحين ما شفت أي لافته .........هااااه شنو هذا لا انا مب ناقصة ارجوج لاتوقفين ارجوج ...البترووووول ما كنت منتبهه له وقفت حور السيارة على جنب وحست باليأس بدت تصيح بحرقة وبصوت عالي ،تذكرت شكل الريال الي خطفها كان معاها في الدوام صحيح كان يطالعها وايد في دخلتها وطلعتها بس ماعطت هالموضوع أي اهمية حاله حال غيره ما كانت تدري انه يخفي في نفسه الخبيثة كل هالافكار ، وتخيلت لو انه نفذ اللي يبيه شكان راح يسوي فيها . فجأة كان في حد يطق الدريشة ، مسحت حور دموعها و التفتت . الريال:خير اختي في شي شفنا السيارة صافة قلنا يمكن محتاجة مساعدة؟ حور وبعد ما حست من عيونه انه صادق:انااا .... انا ماااعرف.....ووويين اروح ..انا ضايعة وما عرف اسوق والسيارة مافيها بترول(ما اقدرت حور تتمالك اعصابها وبدت تصيح) الريال:اهدي اختي ان شاالله راح توصلين البيت سالمة ..تفضلي معانا. حور:معانا؟ الريال:اسمحيلي ادري ان احراج لج بس والله الربع معاي ،بس انا عنديvxr وراح تقعدين ورا. طلعت حور من السيارة ولاحظ الريال الدم اللي على عبايتها ما حب يسألها . الريال: اختي وين بغيتي؟ حور:.......ااا..اقرب مركز للشرطة. الريال:ليش؟ حور:اااانا ذذبحت واحد وابي ابلغ. الريال وهو مستغرب:انتي ؟ حور:ايوه الريال:اوكي تفضلي ركبت حور السيارة وهي مغطية وجهها تخفيفاً للاحراج ،كان الجو هادي محد منهم تكلم في حضورها وتم الوضع على حاله لمدة نصف ساعه ،حست حور ان السايق قال لربعه هم وين رايحين وليش ، لانهم فجأة استغربوا وكل واحد كان يطالع الثاني بس ما سمعت الباقي لان صوت المكيف كان عالي. وقفت السيارة عند مركز الشرطة ،نزلوا الشباب عشان تنزل حور من السيارة. دخلت حور المركز وهي تحس برعب ما حسته من قبل، هل راح يصدقونها؟ ولا راح يقولون انها جات تعترف عشان تغطي جريمتها المُتعمدة؟ ______________________________________ الجزء الرابع الريال وهو يكلم الشرطي: السلام عليكم.. لو سمحت اخوي بغينا الضابط المسؤول في المركز. الشرطي:خير شالسالفة حور:ابي اكلم الضابط او اكبر مسؤول عندكم الشرطي وهو مستغرب:تفضلوا معاي طق الشرطي الباب على الضابط،ودخل وسلم عليه سلامهم الخاص،دخلت معاه حور وتم الريال اللي جابها برا الشرطي:طال عمرك الاخت تسأل عن الضابط المسؤول. الضابط:تفضلي بنتي. كان شكل الضابط يطمن ، تقريباً عمره 40 سنه ذكرها بابوها الله يرحمه، تمت حور ساكته ماتعرف من وين تبدا الضابط:لاتخافين يبا تكلمي حور:حضرة الضابط انا ..انا..ذبحت واحد................. الضابط وهو مستغرب:كملي يابنتي منهو و وين ذبحتيه وليش بدت عيون حور تدمع وهي تقول له السالفة من كانت في الدوام لين ما وصلت المركز الضابط:قلتي لي شسمج حور:حور جاسم ال......... الضابط:طيب وين الريال اللي قلتي انه وصلج المركز حور: اظنه واقف برا الظابط وهو يدق الجهاز :احمد خل الريال اللي عندك يدخل . دخل الريال وسلم عالضابط الضابط:الاسم الكريم الشيخ الريال:حمد ال..... الضابط:حمد من أي منطقه خذت حور وكم كانت الساعة حمد:على طريق الزبارة..وتقريباً كانت الساعة 12 الاربع الضابط: قلتي انج طلعتي من المكان اللي خذج له 10 وتميتي نص ساعة لين لقيتي الشارع وبعدها ساعة في الطريق لين وقفت السيارة يعني صح تقريبا خذتي لج ساعه ونص لين وصلتي الزبارة بما انج كنتي تمشين على60 يعني انا اتوقع من وصفج ان المكان اللي كنتي فيه هو يمكن يكون مدينة الشمال او حولها اذا ما خاب ظني....طيب يا حور اظن هلج ما يدرون وينج - - -كان الحال في بيت بوراشد ما يسر ام راشد خلاص بتستخف تمشي في البيت جنها مينونة ام راشد:وين راحت؟ وينها فيه؟يعني الارض انشقت وبلعتها الساعه وحدة بليل والبنت برا ما نعرف وينها؟ راشد:يُما اشتبيني اسوي انا بنفسي خايف عليها والافكار تاخذ و تودي فيني اتصل على جوالها يعطيني مغلق،اتصلت مية مرة ونفس الشي. ام راشد:خايف عليها؟ليش يا عيوني انا متاكدة ان السالفة هذي وراها سواد ويه.لكن انا اورييج ياحور انا اللي بربيج عدل ،الظاهر ان ابوج ما عرف يربيج ...اي..اتحصلها الحين قاعده تدور ومستانسة وحنا صار لنا سبع ساعات اعصابنا محترقة. هيا وهي اطالعهم وحاطة ريل على ريل:والله ما عندكم سالفة حارقين اعصابكم عالفاضي،يعني اذا ردت وهي ما فيها شي أدبوها ولعنوا شكلها ،واذا صار فيها شي..ههه احسن نكون افتكينا منها . راشد وهو يطالعها بطرف عينه بقرف:حشا ما كانه اللي تتكلمين عنها اختج. ....يرن تلفون راشد... راشد:الو حور:راشد انا حور راشد (بصوت عااااالي وانفعال):حوووور وينج؟ شصاير؟من وين تتصليين؟ ام راشد :عطني اكلمها عطنييييي راشد يأشر لها بيده عشان تصبر: وين؟مركز شرطة الزبارة؟ ام راشد وهيا:الزبارة ..شموديها هناك؟ راشد:ان شا الله جاي جاي الحين طالع بند راشد تلفونه ولبس غترته وعقاله ام راشد:ليش الشرطة شمسويه الخايسة راشد:مادري مادري يُما بس قالت لي جيب معاك مبلغ للكفالة ام راشد(وهي تلطم):السالفة فيها كفاله يافظيحتي يافظيحتي. هيا كانت ساكته ..كان الموضوع صدمة بالنسبة لها لدرجة انها ما علقت عليه
القلب الابيض جماعيني ولا في الخيال
عدد الرسائل : 4840 العمر : 32 تاريخ التسجيل : 28/04/2008
موضوع: رد: قصة حب في اليونان الثلاثاء يوليو 22, 2008 5:58 am
الجزء الخامس وصل راشد المركز ،شافته حور وهو داخل ركضت له ،تفاجأ راشد بشكل اخته كانت حالتها حاله مضروبه وعيونها حمرا غير الغبار و الدم اللي كان مغطي عبايتها . راشد:حور اشصار فيج حور وهي تلم اخوها متجاهلة المكان العام اللي هي فيه(بصياح):راشد .....بلوة وطاحت على راسي(وخرت عنه والدموع مغطيه وجها)راشد انا ذبحت واحد والشرطة اللحين تحاول تعرف المكان اللي كنت فيه عشان يتأكدون من صحة كلامي لاني ماعرف وين كنت كانت التفاصيل تنصب على راشد وهو مب عارف اصلاً شالسالفة بالضبط. راشد:اهدي حور انا بروح ادفع كفالتج وباخذج اوكي انطريني هني. حور وهي تقعد عالكرسي:ان شاالله دفع راشد كفالتها وخذ حور من المركز ، في السيارة قالت حور لراشد السالفة كلها ، حس راشد انه بينفجر من الحرة لو حور ما ذبحته كان هو قام بالمهمة، مجرد تخيل شكل اخته حور برقتها ونعومتها تنضرب وتنجر من شعرها يعور قلبه وحس ان الغلط منه لو ماسمح لها انها اتم في الشغل لوقت متأخر ما كان صار الي صار لكن قدر الله وما شاء فعل. وصلوا البيت ونزلت حور من السيارة وهي خلاص تعبانه ومنهكه لابعد الحدود،دخلوا الصالة، وكانت ام راشد وهيا للحين قاعدين ولما شافوا حور انصدموا من شكلها. ام راشد بصوت عالي:ياويلي من سوى فيج جذي، شمسويه يامسودة الويه م... قاطعها راشد:يُما حور تعبانه ومحتاجة ترتاح انا بقول لج السالفة كلها،حور روحي ارتاحي طلعت حور ونظرات ام راشد المليانه كره تلحقها،، قال لهم راشد السالفة كلها وام راشد طبعا كل ساعة تقاطعه بتفسيراتها الخاصة للموضوع لانها مستحيل تقتنع ان حور مظلومة. في هالوقت كانت حور تسبح حسسها الماي الحار بالراحة وتذكرت المرحوم لو كان موجود اشراح يسوي واشراح يكون موقفه من السالفة اكيد راح يوقف معاها لكن في قرارة نفسه هل راح يصدقها لان سالفتها معقدة....قطع افكارها صوت مرت ابوها عند باب حجرتها وهي اتصارخ،،،لبست حور روب الحمام بسرعه وطلعت لكنها ترددت انها تفتح باب الحجرة. ام راشد:شبقول للناس ولا شبغطي اقول بنت ريلي ذبحت واحد لانه كان بيعتدي عليها لا لا مستحيل يصدقون،لكن شقول العرق دساس ما رحتي بعيد من امج الكافرة النجسه. اخر كلمتين كانوا بالنسبة لحور مثل الطعنات ما كانت هذي اول مرة تنسب فيها امها جدامها لكن هذي اول مرة تنسب بهالطريقة البشعة،هم حتى مايعرفون امها ليش يحكمون عليها بهالطريقة. حور: اااااه يا يُما عمرج ماسئلتي عني ولا اتصلتي لي ،، لهالدرجة انا ما اعني لج شي ،انتي بالنسبة لي انسان مجهول ما املك غير صورة قديمة عمرها22 سنه . مسكت حور الصورة اللي كانت لامها وابوها وهي معاهم كان لها سنه وكانوا رايحين اليونان زيارة لأهل امها،،تأملت حور في وجه امها ما كانت تشبها واجد،،، خذت منها البياض ولون العيون والابتسامه بس الملامح والطول والشعر من ابوها ،، شوي شوي بدت حور تغط في نوم عميييييييييييييق من التعب والارهاق اللي شافته في هذا اليوم اللي راح يغير حياتها 180 درجة. __ __ __ في اليوم الثاني على طول ما قصر راشد اتصل بخاله سالم (محامي)وطلب مساعدته في الموضوع،كان واثق ان حور راح تطلع برائه لكنه حب يحتاط لان يمكن اهل الريال يعترضون ويصرون على ان ولدهم انقتل بالعمد . لكن الموضوع سار على احسن ما يرام ،الشرطة عرفت المكان وتبين من المكان ان فعلاً بصمات حور عالدرييشه انها كانت تحاول تشرد وثياب الضحية المشققة كانت تدل على انها حاولت اتدافع عن نفسها ،واللي زاد الطين بله ان سيارته كان فيها ممنوعات وخمور وبلاوي مما يأكد انه شخص مجرم . كل هالمعلومات كان سالم يقولها لراشد وهم قاعدين في مجلس راشد. راشد:انزين محد من اهل الريال بين او اعترض على تبرئة حور سالم:أي اهل الله يهداك محد منهم بين،رفيجه يوم سمع بالسالفة جا واعترف ضده وقال ان خالد (الضحيه) كان يطري حور قدامه مرات ويوصفها له وانه حس انه ناوي عالشر،هذا غير اني كلمت رفيجتها ساميه اللي عطيتني رقمها وجات النيابه وقالت انها هي اللي طلبت من حور تبقى في الشغل و خالد هو اللي قالها ان اهلها ناطرينها برا. راشد(بحره): الوصخ لهالدرجة نفسه دنية ،يا مكثرهم الوصخات وبنات الحرام اشله يلاحق هالمسكينة ويخطفها ويضربها. سالم(وهو يقوم):انت قلتها بنفسك وصخ ونفسه دنيه...عيل انا اترخص راشد:وين الخال اقعد تغدا معانا امي بتزعل ان درت انك جيت وما سلمت عليها،تدري هي في العدة وما تطلع برا .. فتستانس بشوفة أي حد. سالم:أي حد يالخايس راشد:ههههههههه لا خالي السموحة ما كان قصدي والله سالم :خلاص بروح اصلاً ام العيال ناطرتني تدري تحبني ماتتغدى بدوني راشد:ههههه ادري الحب مقطع بعضه بينكم. سالم :يالله مع السلامه راشد:فمان الله كانت الساعة 2الظهر لما قامت حور مفزوعه من نومها ،كانت احدث الامس تنغص عليها نومها، الكوابيس تمت ملازمتها ،قرت حور المعوذتين واية الكرسي وتمت تستغفر ربها لين ما هدت شوي ،شلت اللحاف عنها ودخلت الحمام تتوضا لصلاة الظهر ،مافي احسن من الصلاة عشان الواحد يهدي نفسه التعبانه ،صلت حور الظهر ولبست جلابيه فلسطينية، و وقفت جدام المنظرة تمشط شعرها الاسود الطويل ،كان التضاد بين بياض وجهها وسواد شعرها سر جمالها النادر،تأملت حور الجروح اللي في وجهها دمعت عينها وهي تذكر الطريقه اللي مسك فيها جسمها ،، حست بتقزز وكره ،،وللحظة ما تندمت انها ذبحته لانه لو ما ذبحته راح تكون اما ميته او مُغتصبة،والبنت اذا راح شرفها في مجتمعنا ،،تقول علي السلام،،، ربطت حور شعرها على شكل ذيل وطلعت من الحجرة وهي مهيئة نفسها لكلام مرت ابوها،لكنها فوجئت بالأدهى منها وهي طبعاً هيا. هيا:انا لو مكانج لا قدر الله ما اطلع من حجرتي ولا اوري حد رقعة ويهي. حور:هيا الله يخليج خليني فحالي هيا:اذا انا خليتج في حالج تظنين الناس بخلونج فحالج حبيبتي اصحي احنا في قطر يعني لو انتي ذابحه ذبانة بعد اسبوع الناس بتقول ذابحة فيل فما بالج بآدمي ، تظنين السالفة خلاص بتوقف عند هالحد لو كل القضاة برؤوج وحطوا خبر في كل الجرايد انج بريئه ،،،بعد راح يطلعون عليج كلام واشاعات حور:الناس ما تهمني يا هيا اهم شي ربي عالم اني مظلومة واني ما ذبحته متعمدة. هيا:الناس ما تهمج صح؟ليش انتي وين عايشة في غابة بين حيوانات عشان ماتهتمين لكلام الناس،حبيبتي قولي هالكلام باجر لين قعدتي بين الناس وقطوا عليج ذاك الكلام الزين ولا لين صكيتي الثلاثين مب لاقيه ريل يرضى فيج. حور ماقدرت تستحمل الكلام السم اللي قاعدة تسمعه ،خلت هيا وراحت عنها. هيا (بصوت عالي): ماتهتمين صح اذا أنا وحده ما استحملتيني دقيقة . شاف راشد حور وهي نازلة من الدرج ابتسم لها ابتسامه رَيحتها وتذكرت حديث الرسول –صلى الله عليه وسلم-(ابتسامتك في وجه اخيك صدقه) هيا غثتها بكلامها وراشد بابتسامه ريحها. راشد:اشلونج الحين ان شاالله احسن من أمس حور وهي تتنهد:اااه الحمد لله احسن راشد:انا عندي لج اخبار حلوة حور:شنهي راشد:الشرطة لقت المكان اللي كنتي فيه والسيارة وحصلوا بلاوي الاخ شكله كان رايح فيها من قلب ،،وبايع الاخرة،،يعني مخدرات على حشيش على خمر،لا ورفيجتج ساميه جت النيابة وشهدت لصالحج حتى واحد من ربعه شهد ضده حور:شهد ضده؟؟اشقال راشد:ااااه قال قال والله وايد اشيا ما اتذكرها بس انه مب زين وراعي سوالف. حور:الحمد لله.. واهله ما بينوا راشد:انا كنت خايف منهم لكن الظاهر اللي سمعوه من النيابة من ادلة وبراهين خلاهم يسكتون ويمكن متوقعين هالشي منه. حور:راشد..اتشوف ان عادي ارد الشغل راشد:حور انا عارف انه محرج لج بس اذا ما رحتي راح اتاكدين الاشاعات اللي بتطلع حور في نفسها :الظاهر اللي قالته هيا صح حتى راشد يتوقع الاشاعات. رن تلفون البيت وردت حور. حور:الو نعم ساميه:حور حبيبتي اشلونج شخبارج ان شاالله بخير ،انا منحوسة وكل من يقرب صوبي يصيده شي مني،اسفة حور والله اسفة سامحيني الله يخليج. حور:ساميه اشفيج انتي مالج ذنب كل شي كان مقدر ومكتوب والحمد لله الأمور ماشية تمام وكل شي في صالحي. سامية:اااه فديتج والله ماعرف شقول لج،ان شاالله بتجين الدوام الاحد . حور:ان شاالله بداوم الاحد. ساميه:طيب ياحور ما ابي اطول عليج يمكن تعبانه وما لج خلق تتكلمين انكمل سوالف في الدوام ..اوكي حور:ان شاالله ساميه:عيل اخليج الحين ..مع السلامة. ام راشد كانت واقفة ورا حور وهي تتكلممع ساميه. ام راشد:جني سمعت انج ناوية تردين الدوام، وبأمر من ومن اللي راح يخليج تطلعين ولا تشبرين برا البيت؟
القلب الابيض جماعيني ولا في الخيال
عدد الرسائل : 4840 العمر : 32 تاريخ التسجيل : 28/04/2008
موضوع: رد: قصة حب في اليونان الثلاثاء يوليو 22, 2008 6:00 am
الجزء السادس ام راشد:جني سمعت انج ناوية تردين الدوام، وبأمر من ومن اللي راح يخليج تطلعين ولا تشبرين برا البيت؟ مسكت ام راشد حور من شعرها حور وهي تتألم:بس انا توقعت ان هذا شي طبيعي واني لازم ارد شغلي راشد: يُما هديها ..يُما صلي عالنبي أنا قلت لج خالي سالم اشقال فماله داعي كل هذا. ام راشد(بصراخ):راشد اختك هذي جابتلنا مصيبة وحده ماراح انطرها بعد تجيب لي مصيبة ثانية. ما ابي الناس تقول مات بو راشد من هالصوب وضاعوا عياله من الصوب الثاني. راشد(وهو يحاول يفج بينهم):يُما هديها الله يخليج انتي هديها وما راح يصير الا اللي تبينه. واخيراً تركتها وركضت حور على حجرتها وهي تصيح،دخلت حجرتها وهي تحس ان كرامتها امسحت في الأرض ، مرت ابوها على حياة بو راشد ما كانت تتجرأ تمسها بكلمة فحضوره لانها عارفة مكانة حور عند ابوها . قعدت حور عالأرض وهي ضامه الصورة العائليه الوحيدة عندها. حور(بصياح):وينكم وينكم مالي حد في هالدنيا يبا ليش خليتني ورحت ليش ااااه مافي حد حاس فيني يظنون ان سهل الواحد يذبح انسان وانه راح يمارس حياته عادي ما يدرون اني احاول اخش الشعور اللي فيني للحين احس بالغرشه وانا ادخلها في رقبته للحين اشم ريحة الدم اللي انرش علي ريحة المكان والسيارة للحين اشمها، راشد:حور.. حور ..ممكن ادخل قامت حور من مكانها وقعدت عالسرير حور:تفضل راشد:حور خلاص كلمت امي وقا..حور اشفيج حور:مافيني شي راشد بس نفسيتي تعبانه شوي راشد:حور ادري ان معاملة امي لج كريهه بس شسوي هذي امي وما اقدر اهاوشها حور:خلاص ياراشد انا ما لومك مثل ما قلت هذي امك وواجب تحترمها راشد:على العموم انا كلمتها وفهمتها وخلاص رضت انج اداومين حور:اوكي (في نفسها :بعد ما هزئتني) راشد وهو يمسح على ظهرها:ها للحين زعلانه تأملت حور ملامح اخوها كان شكل راشد يوحي انه شيطان ولعّاب لكن في الواقع كان طيب وعلى نياته و شكله بيتحمل المسؤوليه مبكر،مسكين يحاول قد ما يقدر يرضي جميع الأطراف. حور:خلاص صدقني نسيت السالفة كلها راشد:يعني صافي يا لبن حور:ههههه حليب يا اشطة راشد:اقول حور حور: قول راشد:شفتي ويه أمي وهي جاره شعرج حور:اشفيه راشد :تخرع..حسيت انها بتتحول كائن ثاني حور:ههههههه الله يقطع بليسك ..حتى انا راشد: بس جب حور:يااا...اشفيك انت اللي قلت راشد(بعبط):انا اتطنز على امي عادي بس غيري لا حور:الحمد لله والشكر قوم قوم اذن العصر اقوم اصلي ابرك من مجابل ويهك. راشد:إي والله ما باقي شي عالاقامة ..يالله اخليج قامت حور تصلي العصر وبعد الصلاه فضلت انها ماتطلع من حجرتها عشان ماتتعرض لها مرت ابوها او هيا. في اليوم الثاني راحت حور الشغل وهي تحس بألم بمعدتها من التوتر،نزلت من السيارة بس قبل لتدخل نادها راشد ،قربت من السيارة راشد:حور ابيج تستأذنين اليوم الساعة 10 ،امس خالي سالم قال لي لازم انروح اليوم النيابة لأن في شوية اجراءات لازم نخلصها..اوكي حور:ان شا الله.. راشد:يالله مع السلامه حور:مع السلامه..(ياسلام الم بطني تضاعف ياليت ما تريقت ..اففففف احس اني بستفرغ) دخلت حور المبنى وهي تتحاشى النظر لأي احد،التوتر اللي حاسه فيه نساها حتى شلون تمشي،دخلت مكتبها وقعدت ترتب اوراقها ،دخل مديرها. المدير(بيتر)(بالانجليزي):كيف حالك هور حور:بخير سيد بيتر. المدير:جميع الموظفين في الشركة اسفون لما حدث لك واعلمي اننا جميعاً مستعدون لتقديم المساعدة لكِ. حور:شكراً لك سيد بيتر انني فعلاً اقدر هذه البادرة منك. المدير وهو يدخل مكتبه:عفواً. حور:صج كلام مب طالع من القلب،من باب المجاملة لا اكثر ولا اقل . صارت الساعة 9ونص وكانت حور تحاول تخلص شغلها بسرعه عشان تستأذن من المدير ،،لاحظت حور ان البنات ما مروا عليها اليوم ، العاده الموظفات اللي معاها في الشغل يمرون عليها عشان يعطونها اخر الأخبار في الشركه يعني من تزوجت ،من تطلقت،من توظف،ومن تفنش..لكن اليوم صار لها ساعتين ونص في الدوام ومحد مر عليها. يرن تلفون حور...... حور:هلا راشد وينك الحين راشد:انا في الطريق خمس دقايق واكون عند الباب ان شاالله. حور:اوكي انا بستأذن وبجيك. راشد:اوكي يالله فمان الله رتبت حور مكتبها قبل لتطلع وراحت للمدير واستأذنت منه،،وهي طالعة شافت (عهود ونورة)صدوا عنها بطريقة توحي انهم ما شافوها،،لكن حور افهمت الحركة وتذكرت كلام اختها هيا ،الظاهر ان هيا اصغر منها في السن وبس لكنها تعرف الناس وطبيعتهم اكثر منها. وصل راشد وخذ حور وراحوا النيابه وكان سالم خال راشد بانتظارهم والصراحة ما قصر قام باللازم وزيادة . في هالوقت في واحد حور شاغلة تفكيره من يوم ما شافها في البر طبعاً اذا نسيتوه انا بذكركم(حمد)،كان شكلها الخايف والمبهدل ساكن خياله ،وتم يفكر بطريقه لوضع حد لهالتفكير والشوق واخيراً قرر ان يفاتح أمه بالموضوع. كانت ام حمد قاعده في الصالة تشرب شاي العصر مع بو حمد. ام حمد:هلا والله بنظر عيني بوحمد وهو يلتفت وراه شاف حمد جاي:اقول انا هالكلام الحلو اكيد مب لي حمد:اشدعوه يبا انت الخير والبركه وأكيد في كلام حلو بس ما ينقال جدامنا. بوحمد:والله يبا لا من وراكم ولا جدامكم . ام حمد:ما عليك منه هالشايب كبر وخرف ،،انت قول لي اشفيك اليوم مارحت الشغل. حمد(وهو يتنهد):لا أبد يُما ما في شي بس تعبان شوي. ام حمد:وي اسم الله عليك يُما اشفيك. بوحمد :اشفيه يعني قاعد جدامج مثل الثور بس يدلع. ام حمد:انا ولدي ثور هالزين كله تقول عنه ثور فديته والله اللي مقطع البنات. بوحمد بصوت واطي:صج القرد في عيون أمه غزال. حمد:يُما أنا ابي اكلمج في موضوع مهم. ام حمد:شنو هالعمضوع بوحمد:هههههه يالخبلة يقول لج مووووضوووع يعني سالفة ..حجوة. ام حمد:قوول يُما قول فديتك . حمد:ابي اتزوج. ام حمد:كللللللللللللللللللوش. بوحمد:وجع وجع صميتي اذني . ام حمد:عندي لك بنت يُما ..بنت ناس وتقط الطير من السما. بوحمد:حشا مب بنت هذي ..شوزن ام حمد:اففففف منك خلني اكلم ولدي ..انزين يُما و..... قاطعها حمد:يُما البنت موجودة . ام حمد:موجودة؟؟ليكون تبي تاخذ وحده من هالخِيَس. حمد:لا يُما اشدعوه انا مب راعي هالسوالف ام حمد:عيل وين شفتها وشلون عرفت انها مب متزوجة حمد:يُما تذكرين البنت اللي قلت لكم عنها ،اللي شفناها في البر. ام حمد:أي اللي ذبحت واحد اشفيها. حمد:هاذي هي. ام حمد:شنو ياويلي ويلاه ياويلي ولدي يبي ياخذ قصابه. حمد وهو فيه الضحكة:يُما أي قصابه البنت كانت ادافع عن نفسها والبنت اللي ادافع عن شرفها بهالطريقة يشرفني انها تكون زوجتي. ام حمد:لا لا يا ولدي لا امس ام علي تسولف لي عنها وتقول امها مادري شصلها ..قالت لي بلاد بس ما اذكر اسمها جنه ينان ..ونان ..مادري بس هي من هالانجليز الله يقطعهم. بو حمد:احسن ختحسن النسل..خذها يبا خذها لا تسوي مثلي انا ظلمتكم يوم خذت امكم شوفوا شلون اشكالكم صايرة. ام حمد:انت اسكت انت وما لك خص في سوالف الحريم انا اللي اقول ياخذها ولا لا وانت عاد الحين من زينك شيفه مقعدة في البيت. حمد وهو يائس:يُما يُبا الله يخليكم اسمعوني بسكم هواش ..انا البنت شفتها وقلبي ارتاح لها وما حسيت انها من هذول البنات ..يُما انتي شوفيها واحكمي ما راح تخسرين شي واذا ما ارتحتي لها اوعدج اني راح انسى الموضوع. ام حمد:يُما فديتك يعني بنت ياخذها واحد لآخر الدنيا وترد سالمه يعني. حمد:أي يُما يصير بعدين هي ذبحته قبل لايزخها. ام حمد:آآآآه منك طالع حنّان على ابوك،انا بكلم خالاتك اول اذا وافقوا بنروح،واذا ما رضوا انا مب رايحة بروحي. بو حمد: شفت حمد كلامي طلع صح حمد:أي كلام يُبا بوحمد:يوم قلت لك ان امك ما تقدر اتشك خيط بإبرة بدون خواتها مع انها الكبيرة ام حمد:انا ما اقدر اشك خيط بابرة بدون خواتي احين بتصل لهم وغصباً عنهم يجون واذا ما جوا اروح بنفسي. طلعت ام حمد تتصل بخواتها عشان يجون معاها حمد:يُبا متى قلت لي هالكلام بوحمد:انا ما قلت ، بس امك خبلة تصدق كل شي حمد:ههههههههه والله انكم سالفة
القلب الابيض جماعيني ولا في الخيال
عدد الرسائل : 4840 العمر : 32 تاريخ التسجيل : 28/04/2008
موضوع: رد: قصة حب في اليونان الثلاثاء يوليو 22, 2008 6:01 am
الجزء السابع: ام حمد طبعاً تجري اتصالاتها مع خواتها وهي مهيئه نفسها للهواش معاهم. ام حمد:الو.... السلام عليكم نصور ناد امك .....،شنو فوق؟يعني انا اروح اناديها ،انت رديت عالتلفون وانت ملزوم تناديها..،،شوفوا جليل الحيه يتأفف...الو سبيجه اشلونج اختي ان شا الله بخير سبيجة:الحمد لله اختي بخير.. اشلونهم بوحمد وحمد ام حمد:الحمد لله فديتج... والله بوحمد للحين طايح في جبدي من تقاعد وهو ما يفج اقول له يا ريال روح تاجر سولك شي ان شا الله تاخذ على راسي مره بس فج يقول لي خلك على مينونك لا يجيك اين منه. سبيجه:يا حليله والله انتي من صجك تبينه يعرس ترى الريايل ما يصدقون على الله يموتون عالزواج ام حمد:وييييي ما قلت لج ولده جايني اليوم يبي يتزوج ومشتط ويحن سبيجه:زين والله لازم تستانسين بالعكس يوم بتجيج جنه اتونسج في البيت بدل ما انتي قاعدة بريحاتج. ام حمد:انا ما قلت شي فديتج بس البنت اللي يبيها مادري يعني الله يستر عليها سبيجه:ليش اشفيها ام حمد:تذكرين البنت اللي قلت لج عنها ان حمد لقاها في البر سبيجه:إي إي عرفتها هذي اللي يبيها..اشدعوه اختي بتخطبينها له ام حمد:شسوي اختي هذا وحيدي وما اقدر اكسر بخاطره ما شفتيه وهو يحن كسر خاطري والله ، بعدين قال لي روحي شوفيها واذا ما عجبتج خلاص انسي السالفة. سبيجه:طيب متى بتكلمينهم ؟ ام حمد:ما دري ..انا ما عندي رقمهم بسأل حمد .. واذا عطاني الرقم بكلمهم باجر و بروح اشوفها بعد باجر. سبيجه:والله اختي بعد باجر بشوف ان شا الله يصير خير. ام حمد:ياويلج ان ما جيتي والله ليتشمت فيني بو حمد. سبيجه:لا لا بجي ان شا الله اكيد ام حمد:بلغي الباقي وشوفي من بجي منهم. سبيجه:ان شا الله اختي. ام حمد:يالله فديتج مع السلامه سبيجه:مع السلامه ام حمد وهي داخله الصالة وهذي خالتك كلمناها بس ابيك تعطيني الرقم تراني ماعرف رقمهم ولا اسمهم. حمد وهو مستانس حده:ان شا الله يُما انا من الاسم بطلع رقمهم من الاستعلامات.وراح ركييييييييض يتصل بالاستعلامات ام حمد:ويييييي فديت ولدي شفته شلون يركض مستانس. بو حمد:أي شفته مثل البغل،باجر اذا خذها بيدري انه ما عنده سالفه ونها بتطيح في جبده مثل ما انتي طايحة في جبدي. ام حمد:اففف منك يا العله بو حمد:إلا ما قلتي لي من بروح معاكم ام حمد(بخياس نفس): انا كلمت سبيجه وهي بتكلم الباقي بو حمد:ياويلي كلكم التسعه بتروحون مب زين جذي البنت ما صار لها يومين طالعه من صدمه هالدور تروحون لها كلكم وتخرعونها. ام حمد:لااااااا انا اذا قعدت معاك بستخف اقوم احسن لي بو حمد:اكثر من جذي ما اظن راحت ام حمد وتركت بوحمد بروحه في الصاله ،وحمد طبعاً على طول عطى امه الرقم اللي اكدت له الف مره انها راح تكلمهم باجر الضحى.
في اليوم الثاني حور تأكدت من شكوكها لأن كذا موظفه تحاشوها يعني كانوا يردون السلام بس ما كانوا يطولون في السوالف مثل قبل عالعموم دام هم ما يبون يكلمونها حور مب من النوع اللي تفرض نفسها عالناس،، مهما صار فهي لها كرامتها وما راح تلاحق كل وحده وتشرح لها بالتفصيل اللي صار،،،، مرو عليها ساميه وهند وهي في المكتب. هند وساميه:السلاااااام عليكم حور:بسم الله خرعتوني هند:اسم الله عليج من الخرعه احنا اللي لازم نخاف جايين عند غرفة المدير وقاعدين انسولف مع سكرتيرته ساميه:يولييييييييي من صجج خايفه منه يعني شبسوي بيطردنا ما يقدر مب بكيفه حبيبتي,احنا مب اجانب حور:شوفي هاذي الرد جاهز عندها على طول. هند:ماعليج منها مسوي عمرها قويه عالطل شوفي انا جايه اعزمج يعني مب عزيمه.. هي يمعه انا وانتي وساميه ونوفو اللي كانت معانا في الثانويه. حور تذكرت مرت ابوها وانها لو قالت لها بتسوي لها سالفة هذا غير ان ابوها ما صار له شهر متوفي ومب حلوة انها تطلع وادور. حور:اممممم والله ما ادري هند ما اوعدج يمكن ما اقدر اجي. هند:ليييش حور والله القعدة بدونج انحسها ناقصة. حور:تدرين هند ابوي صار له شهر بس متوفي . هند:وييييييييي الله يقطعني والله نسيت حور كلش ما جا على بالي. ساميه:خلاص بنغير الموعد لعيونج هند:أي راح نغيره حور:ما في داعي والله ترى عادي انتو تجمعوا هالمره والمره الجايه عندي اليمعه وب.... قاطعهم صوت المدير وهو ينادي حور من الجهاز ساميه:ويييي وييييي هندو خلينا نطلع بسررعه احين بيطلع المدير هند:قلت لج قوية عالطل حور:ههههههه راحت حور تشوف المدير اشيبي وهند وساميه ركيييض على مكاتبهم.
عالغدا عيلة بو راشد كلها قاعدة ، وكان الهدوء طاغي عالمكان و ام راشد كل دقيقة اطالع حور ، راشد كان منتبه للوضع وهو حاط يده على قلبه لتصير هوشه ثانيه. ام راشد:حور باجر بعد اذان المغرب زهبي نفسج في ناس بيجون حور باستغراب:من هم؟ ام راشد:مب لازم اتعرفين من هم،،بس جايين يخطبونج لولدهم هيا اهني غصت (تقول في نفسها): يا مال الويعه على السمعه اللي طلعت لج على طول جاج ريل ، صج حظ يفلق الصخر. راشد:شسم الريال يُما ومين منه؟ ام راشد: والله هي قالت لي معاج ام حمدال---- بس مادري اذا حمد هذا هو اللي متقدم ولا اخوه
حور (في نفسها):احس ان الاسم هذا مب غريب علي ..اي لحظه اللي ركبني سيارته ..معقوله يكون هو ..اكيد هو ..مستحيل يكون تشابه اسماء او صدفه . ام راشد:شوفي ما ابي مكياج وخرابيط اطلعي بطبيعتج وما ابيج تاخذين وتعطين في الكلام و اقعدي خمس دقايق واطلعي . راشد:اشعوه يُما عسكريه لازم تتكلم جدامهم وتقعد مده عشان يشوفونها عدل وفي نفس الوقت هي تكون فكره عن هله. ام راشد:نعم نعم تكون فكره،لا بعد قول لي تقعد معاه واتسولف ويعيشون مع بعض مثل الانجليز لا عيوني لو كانت عند امها ختسوي اللي تبيه لكن مادامت قاعده عندي تسوي اللي انا اقول لها اياه وبس. راشد:بل بل يُما ويييييين رحتي... تعيش معاه واتسولف... عالعموم هذي سوالف اتخصكم انتو يالحريم انا مالي خص. ام راشد:يكون احسن...خلاص سمعتيني تنفذين اللي قلت لج اياه بالحرف...هيا يُما ابيج اتروحين الجمعيه وتجيبين شوية اغراض عشان نضيف الحريم. هيا:لاااااااااااااااا يُما شنو جمعيه وقرف انا اجي من المدرسه تعبانه وحالتي حاله. ام راشد:يعني انا في العده تبيني اطلع ما في غيري انا وانت من تختارين. راشد:يُما هيو اشعرفها في هالسوالف خلي حور تروح. ام راشد:لا.. حور لا...... زين رضيت انها اداوم حور:الحمد لله شبعت ----وقامت من عالغدا راشد:يُما ليييش جي كسرتي بخاطرها. ام راشد:كلش عاد خاطرها يهمني ان شا الله تتزوج وافتك من هالبلوة هيا بصوت واطي:واللي في بالي يااااااارب في هالوقت كان حمد قاعد مع أمه وهو يستجوبها لييين طلّع عينها ام حمد:اااااه بيذبحني هالولد بيذبحني بوحمد:زين ولدي عفية عليك كمل كمل فكنا منها حمد:يُما يعني انتي شحسيتي من كلام مرت ابوها ام حمد:يُما ما مداني احس شي قلت لها والله ام راشد نبي نجي باجر انشوف بنتج حور وقالت لي حياكم الله في اي وقت بس هذا اللي صار حمد:يُما يعني ما حسيتي اذا هي استانست من اتصالج ام حمد:أي يُما وقامت ترقص وترقص واطق صبع بو حمد:ههههههههه الله يقطع بليسج وتعرفين اتضحكين ام حمد:يُما فديت قلبك باجر الجمعه بنزورهم ان شاالله واذا قعدت معاهم اقدر اقولك شحسيت بس من التلفون ما اقدر اعرف شي. حمد في نفسه:متى يجي باجر متى بانتظر بفارغ الصبر
في بيت بوراشد كانت حور مب مرتاحه نفسياً للموضوع مرت ابوها شكلها راح تجبرها على الزواج عشان تفتك منها اصلاً هي على حياة ابوها كانت تحن على بو راشد كل ما تقدم شخص لحور والحين بما ان بو راشد مش موجود فأكيد راح تستغل اول فرصة تجيها عشان تفتك منها،لكن هذا ماراح يمنع انها تفكر في الموضوع بجد لأن واحد يتقدم لها بعد الاشاعات اللي طلعت عليها بكون اكيد انسان عقله كبير وما يهتم لكلام الناس ،،،،يرن تلفون حور وبدون ما اطالع الشاشه فأكيد اللي متصل يا هند او سامية لأن بعد السالفة اياها ما قام حد يتصلها في منهم اهلهم امنعوهم،وبعضهم من نفسهم اقطعوا الاتصالات حور:الو هلا هند:السلام عليكم حور:وعليكم السلام هند:حوروووووو سمعتي اخر الأخبار حور في نفسها(أي اخبار وانا مقطوعه عن الدنيا):لا خير اشصاير هند: تعرفين روضة ال--- حور:أي روضة هند:روضو الدبه اللي كانت معانا في الجامعة ،،اللي تتمشى مع دانه ال---،اللي الدكاتره كله يطردونها من المحاضرات،،الهذارة اللزقه حور:استغفر الله استغفر الله شنو هاي هندو شهالغِيبة هند:استغفر الله شسوي ما فيها شي عدل ينذكر بس شوفي النحس ،،عرست ،،يقو لج ماخذه واحد عجيييييييب احلى منها و مهندس و دارس في بريطانيا،مالت على حظوظنا مب أنا دوري أي واحد خايس في الدوحة بقول لج تقدم لي. حور:حرام عليج هندو اذكري الله قولي ما شاالله صج الرازق في السما والحاسد عالأرض . هند(بدون نفس):ما شا الله ماشاالله.. يالله الفال لي ولج. حور وهي تبتسم:امممممم أنا في شي يمكن يصير هند :.......هااااااااااااااااا حورووووووووو شالسالفة حور:في واحد متقدم لي....و هله بيجون باجر هند استخفت :شسمه ومين منه ووين يشتغل وشلوووووووون قولي لي يالله أمووووت على هالسوالف . حور بحرج:تذكرين السالفة اللي صارت لي هند:إي فديتج شلون انسى خلود الخايس. حور:أهو اللي قلت لج وصلني المركز يوم بندت علي السيارة هند:هاااااااااااا حورووو طيحتي الريال يالدبه حتى وانتي مكفخه ومبهدله حلوة يالخايسه ....مايصير أنا أضيع بعد في البر يمكن يلقاني واحد و يحبني . حور:يمكن يلقاج جني ويحبج وياخذج تحت الأرض. هند:يُما لااااااااااااا خلينا عالاوادم وايد أحسن. حور:ههههههههههههههه هند:حورو هالله هالله بالكشخه عاد طيحي أمه ،تبيني أجي أمكيجج. حور:لا مرت أبوي محذرتني ما أحط نقطة مكياج. هند:اشتبي هذي مالها خص فيج اذا بتدخل خلها تتحكم في بنتها هيو القردة. حور:شسوي مابي اعطيها سبب للهواش ..هي أصلاً تنطر مني زله. هند:افففففف الله يعينج عليها حبيبتي ......يالله يالله ارقدي عشان تقومين مورده وخدودج حُمر يالله ارقدي ما دام ما في مكياج خلي الطبيعه تاخذ مجراها هالله هالله بالخيار والروب والعسل. حور:هههههه انزين ولا يهمج هند: يالله مع السلامة تصبحين على خير حبيبتي حور:وانت من هله الساعه كانت توها 9 فضلت حور انها تنام مب عشان مثل ما قالت هند (اتورد)......بس تبي تنهي التفكير في هالموضوع
القلب الابيض جماعيني ولا في الخيال
عدد الرسائل : 4840 العمر : 32 تاريخ التسجيل : 28/04/2008
موضوع: رد: قصة حب في اليونان الثلاثاء يوليو 22, 2008 6:02 am
الجزء الثامن: اليوم الجمعه طبعاً ما أقدر أوصف لكم شعور حمد كان طااااااير من الفرحه بو حمد كان ينادي ولده:حمد حمد يالله باقي ربع ساعه عالأذان حمد:كاني يُبا نازل نازل بوحمد:بل بل اشفيك شاق الحلج ام حمد وهي جايه من المطبخ:بسم الله في حد يحسد ولده عالوناسه بوحمد:للحين انزين ما صار شي شوفيه شلون كاشخ ومتعدل جنه بيشوفها اليوم ام حمد:ان شا الله تكون من نصيبك ياولدي ....الله يفرح قلبك بو حمد:اففففففففففف وخري عني ريحتج مطبخ و حمسه توني متعود ام حمد:هالريحه عشان كرشك .....ليش شمكبر كرشك غير أكلي الزين بوحمد: اللي يقول هي مقصره في الكرش يالله يالله خلنا نلحق عالخطبه
في السيارة كان بوحمد يسول عن البورصة و شلون انكبت العالم اللي باع بيته واللي باع سيارته واللي باع دينه وصار ما يهتم بالحلال والحرام أهم شي انه يجمع في هالفلوس ،،بس حمد كان ي عالم ثاااااااااااااااااااااااااااني عالم ساكنته حور وبس . حمد(بينه وبين نفسه):آآآآآآه يا حور شسويتي فيني أنا ما شفتج الا لحظات بس هاللحظات ما فارقت خيالي ،يارب يارب في هاليوم المبارك تخلي حور من نصيبي . في بيت بو راشد كانت ام راشد رايحه جايه تحضر للضيوف طبعاً مب حباً
في حور ،بس لان هي سم ضروسها حد يقول عنها ما تعرف السنع فلازم كل شي يكون على سنجة عشره (على قولة المصريين). ام راشد:هيا طلعي الطقم الفضي واغسليه عدل ما أبي اشوف أي وصخ هيا:يُما حرام عليج اطلعه كله واغسله خلي حور تغسلة وانا اطلعه من الكرتون. ام راشد:انزين ناديها هي قاعده تنظف المجلس اففففففففف واحنا ما سفرنا الشغاله الا الحين. كانت حور تنظف المجلس بالمكنسه لما دخلت هيا. هيا بصوت عالي: حورو حورووووووو انتي إيييييييييييييييييييييه اكلمج بنديها بندت حور المكنسه هيا:والله العظيم غبيه يعني من غيري انا وانتِ اهني تسألني بعد تكلميني اكيد اكلمج عيل اكلم الطوفه روحي غسلي الصحون انا طلعتهم من الكرتون. حور:انزين بنظف المجلس وبجي. هيا:يالله بسرررعه جلدي جلدي. حور وهي تشغل المكنسه:افففف يا ثقل دمج خلصت حور تنظيف المجلس وراحت تغسل الصحون و طبعاً الشغل ما وقف لهالحد لأن حور ساعدت ام راشد في أطباق التقديم وفي أطباق الحلو وفي كللللللللللللللل شي ،، ولما خلصت حور كانت الساعه 5يعني جدامها ساعه بس تطلع لهم.راحت حور ركيييييييييييييض الغرفة عالله تجهز بسرعه. دخلت حور الصاله وشافت هيا قاعده تشوف تلفزيون هيا:ههههههههه الله يخليج حور اطلعي لهم جذي اتهبلين وريحتج..... يالله ادوخ بلد. حور:لو اني ملعوزة نفسي بالطين وانتي بكامل اناقتج أضل أحلى منج. وتركتها وصعدت الدرج هيا(هي منصدمة):هااااااااااااااااا انتي الشيفه يالخايسه...ان شاء الله ماتعرسين وتعنسين يااااااارب طنشتها حور ودخلت حجرتها تتعدل و طبعاً ما حطت مكياج تبعاً لتحذيرات مرت ابوها .،لبست حور فستان بسيييط وناعم لونه ازرق فاتح له رقبه مكشكشه وكسرات عالصدر ،ضيق عند الخصر بعدين يجي واسع ولهة اكمام واسعه بس تنربط عند الرسغ بشريطة وعشان ما تطلع وايد طويله لبست صندل واطي له خيوط تنربط على ساقها،،، أما شعرها الأسود الواصل لين نهاية خصرها فخلته مهدود ولبست شغابات زرقا طويله وخاتم ازرق كبير ، يعني كانت قمه في النعومه والجمال، تعطرت حور وبينما هي تمشط شعرها طرشت لها هيا مسج "يالشيفه الحريم في المجلس روحي وخرعيهم" ضحكت حور لأن الظاهر هيا للحين محترة وهذا الشي يشفي غليلها شوي،، عالكرف اللي كرفته في المطبخ. نزلت حور وشافها راشد في الصاله راشد:الله الله شهالكشخه شهالكشخه عاش الأزرق حور بخجل:راشد خلااااااص بنفسي مرتبكه كنت أظن انه عادي بس الحين احس ان بطني بدا يعورني راشد:هههههههه روحي روحي مع هالبطن كل المشاعر تطلع في بطنج حور:راشد ادخل معاي يصير. راشد تحمس:صج والله يصير بس اذا في وحده حلوه و مب متزوجه و اصغر مني بدش بس اذا ما في اقتراحج مرفوووووووض جات ام راشد في هالوقت ام راشد:انتي وينج الحريم صار لهم ساعه الا ربع قاعدين يالله ادخلي قاعده اتسولف وانت شمقعدك في البيت ما قلت لك اذا جوا الحريم اطلع من البيت. راشد:بل بل اشدعوه يُما تراني قاعد في الصاله وهم في المجلس ام راشد:بس بعد عيب اذا في حريم في البيت لازم الرياييل يطلعون. راشد:خلاص خلاص طالع طالع بل مايسوى علي.. لبس راشد غترته وطلع ام راشد:يالله ادخلي دخلت حور المجلس وقلبها بيطلع من حلجها من التوتر كانوا وايد تقريباُ 5حريم سلمت عليهم وكانت تبي تقعد بعيد عنهم بس نادتها وحده واللي هي طبعاً ام حمد بس حور ماتدري انها امه للحين ام حمد:تعالي حبيبتي شمقعدج بعيد خلينا نكحل عيونا بهالطله الحلوه حور بخجل وهي منزله راسها:تسلمين يُما سبيجه:ارفعي راسج يُما اللي مثلج ماينزل راسه ما شالله ما غلط اللي سماج حور ام سعود: اذكروا الله ياجماعه بتنضلون البنت ام علي:ما شا الله ماشالله إلا يُما قولي لي انتي وين تشتغلين حور راح صوتها من الاحراج:احم اااأشتغل في شركة....سكرتيره ام جاسم:ليش انتي ما درستي في الجامعه حور:لا بلى خالتي كان تخصصي انجليزي بس الوظيفة هاذي دوامها مريح والراتب زين وقريب من بيتنا فكان أحسن غير انهم الوحيدين اللي ردوا علي بسرعه وقالوا لي احنا راح اندربج عالسكرتاريا. ام حمد:يُما شغلج من هالأبراج اللي عالكورنيش حور:إي خالتي ام حمد:زين قريب من بيتنا انحرجت حور وعرفت ان هذي أمه ام راشد كانت اتأشر لحور عشان تطلع،،،ولما قامت حور تبي تطلع مسكتها ام حمد: وين رايحه يُما اقعدي اقعدي احنا مب غرب ام راشد(صادتها وهي اتأشر) انا دايماً لين اروح مع خواتي نخطب لعيالهم او حد يخطب من عندنا أحب كل شي ينقال عن الريال يكون جدام البنت عشان تسمع باذنها الكلام،عدل كلامي يا ام راشد. ام راشد(وهي كاتمه الحره اللي فيها):اكيد فديتج اكيد صح ام حمد:شوفي فديتج حمد ولدي مُدرس في مدرسة...عمره 28 والحمد لله يصلي وانا ماراح امدحه لج لان بتقولين أمه ولازم تمدحه انتو اسألوا عنه وشوفوا والله يكتب اللي فيه الخير وهااااذي صورته (افتحت شنطتها)هاج يُما تمقلي فيها عدل . ابتسمت حور وحست بالراحه من ناحية أمه يبين عليها حليوة من جذي رضت تخطبني له. ام راشد:بس يا جماعه احب اقول ان اذا الله كتب ...ما نبي خطوبه وطقطقه بس على طول عرس و يكون بعد فتره معقوله لأن ابوها ما صار له شهر ونص متوفي. ام علي:اكيد اكيد فديتج والله سامحينا ما كنا ندري بس ان شاالله مايصير الا اللي يريحكم. ام حمد:لا أكيد فديتج بننطر احنا ام حمد ساسرت حور في اذنها: بس ذاك شينطره تراه متولع فيج وناطرنا في البيت يبي يسمع الأخبار وهي حاره.. فرش يعني. ابتسمت حور وخلااااااااص صارت طماطة من الاحراج ام علي :انتي شقلتي للبنت شوفيها اشلون محمره. ام حمد:ما قلت شي صح يُما ما قلت شي صح...(ام حمد وهي تقوم) عيل نترخص ام راشد مشكورة فديتج ما قصرتي والله انتفخنا بعد مافي داعي نتعشا ولا نتريق باجر. ام راشد:لا والله سامحونا عالقصور هذا شي بسيط مب قدركم سبيجه:لا والله ماقصرتي فديتج يبين كله شغل بيت ومتعوب عليه اكيد حور لها يد في الموضوع ام حمد:صج يُما ؟ حور:يعني.....بس طبعاً ام راشد هي الكل في الكل ام راشد :وبعد بنتي هيا فديتها. ام جاسم: وينها ما شفناها. ام راشد:ان شاالله مره ثانيه ام حمد :يالله عيل انشوفكم ان شاالله على خير مع السلامه سلموا الحريم على ام راشد وحور وطلعوا ،مشت ام راشد معاهم لين باب المجلس و استسمحت منهم نها ما تقدر توصلهم لين باب الحوش لأنها في العده،،بعد ما تأكدت انهم اطلعوا التفتت لحور. ام راشد بصراخ:ليش ما رحتي معاههم بعد يكون أحسن،ماتستحين على ويهج اتسولف وتضحك وقاعده ولا عليها... بنات الناس يقعدون خمس دقايق ويطلعون وهم ميتين من الحيا وانتي امبسطه معاهم ومستانسه عالمدح والتغزل ,،والصورة اللي في يدج تكون في غرفتي قبل لترقدين فاهمه ولا خاطرج بكف على ويهج يخليج تفهمين، بعد ما تبدلين ثيابج نظفي المجلس والصحون. حور وهي كاتمه الصيحه:ان شا الله راحت حور غرفتها عشان تبدل ملابسها ،،،قعدت عالسرير وطلعت الصورة من الظرف ،حست حور بالارتباك لأنه ذكرها بذاك اليوم المشؤوم لكنها حاولت تنسى وتركز في الصورة ،،ماكان وسيم وايد كان اللي يميزه انه جذاب يعني وجهه رجولي بزياااده ويوحي انه اكبر من سنه اسمر و عيونه صغار وخشمه ضعيف وشوي طويل شفايفه صغيرة بس حواجبه مميزه فيه لأنها مرتبه وجنها محفوفة بالخيط،دخلت حور الصورة في الظرف بدون ما تحس أي احساس معين اتجاهه ما كانت متضايقه ولا مرتاحه وما كانت حور مستعجله عالاحساس لأن شعورها بعدصلاة الاستخارة هو اللي يقرر لها اذا يناسبها او لا،،،بدلت حور ملابسها وطلعت وحطت الصورة في غرفة مرت ابوها وراحت تنفذ أوامر مرت ابوها.
في بيت بو حمد كان في واحد يحترق وخلاص تفحم. حمد وهو معصب:ابي اعرف امي ليش مطلعه جوال اذا ما تاخذه معاها بو حمد:أمك ويه جوال هي ماخذته بس عشان تفاشر فيه جدام العيايز ولا هي تلفون البيت وايد عليها تدري انها كانت بدل ما تحطه على اذنها كانت تحطه على حلجها على بالها الصوت جذي يكون أوضح..الحمد لله والشكر ..كاهي شرفت عيوز النار ..تعالي ولدج لوع جبدي من الحنه. ام حمد:النار اللي تاكلك يالشيبه وافتك من لسانك اللي ما يعرف الا الحجي الخايس. حمد:يُما يُما خلج معاي شفتيها. ام حمد:إي يُما شفتها شنو عيووووون شنو شعررررررررررر شنو بيااااااااض شنو خشممممممم يالله يالله قمر قمر قاعد جدامي لا وبعد ما حاطه ولا شي من هالخياس اللي يحطونه البنات جنها تدري انها ما تحتاجه لا ومتعدله لابسه ازرق فااااتح يازينها ياولدي والله ما ألومك . كان هالكلام يروي ظما حمد كان منتبه لكل كلمه تقولها أمه وخاطره يسجل صوتها عشان يعيد الشريط متى ما اشتاق لحور. حمد:كملي يُما كملي بعد اشصار. ام حمد:بس مرت ابوها ماتبي لا خطوبه ولا طقطقه انا قلت لها انزين بس تولييييييي و حيدي وما افرح فيه والله لجيب طقاقات في الخطوبة ،وصراحه هالمره ماارتحت لها كل ساعه اتأشر لحور عشان تطلع قمت مسكتها من يدها وقعدتها. حمد في قلبه :ليتها يدي ام حمد:وعطيتها صورتك وقلت لها في اذنها انك ميت فيها حمد:يُمااااااااااااااااااااااا صج قلتي لها ولا تمزحين بو حمد:انا اصدق أمك خبله وتسويها حمد:يُما شنو ذي والله فشيله جي هيبتي تهتز بوحمد:دام هذي أمك سلم على هيبتك ام حمد:هذا جزاي اللي معطتكم ويه واسولف لكم .... اقوم اصلي العشا احسن لي من امجابل وجيهكم. حمد:كملي يُما كملي . ام حمد:ولا كلمه زيادة تطنزون علي انت وابوك اتصل حق وحده من خالاتك اللي جوا معاي بتقول لك اشصار. (وراحت غرفتها) حمد:كله منك يُبا تطنزت عليها لين ما زعلت ولا كملت. بوحمد:صدقني ولدي لما اشوف أمك الطنازه تجي علساني بدون ما أقصد استغفر الله ربي لا تبليني. داس حمد على كرامته واتصل لخالته سبيجه لانها اصغر وحده والاحراج معاها أقل وسألها عن مكان شغلها وتخصصها ولأول مره يخلي حمد وحده من خالاته تاخذ راحتها في الكلام والتعبير والوصف . في الليل كانت حور تصلي استخاره لأن ما في أحسن من مشاورة رب العالمين وعالم الغيب اذا كان الانسان حاير في شي حور بعد ما خلصت الركعتين رفعت يدها للي مايرد أي مخلوق:اللهم اني استخيرك بعلمك واستقدرك بقدرتك واسألك من فضلك العظيم فإنك تعلم ولا أعلم وتقدر ولا أقدر وأنت علام الغيوب اللهم ان كنت تعلم ان حمد خيرٌ لي في ديني ودنياي ومعاشي وعاقبةِ فاقدره لي ويسره لي ثم بارك لي فيه وان كنت تعلم ان حمد شرٌ لي في ديني ودنياي ومعاشي وعاقبة أمري فاصرفني عنه واصرفه عني واقدر لي الخير حيث كان ثم رضني به. يااااارب
أما نتيجة الاستخارة راح نعرفها ان شا الله في الجزء الجاي
ahmad muaiad مشرف
عدد الرسائل : 1550 العمر : 30 المزاج : عادي تاريخ التسجيل : 04/07/2008
موضوع: رد: قصة حب في اليونان الجمعة يوليو 25, 2008 10:02 am
موضوع: قصة حب في اليونان 
الثلاثاء يوليو 22, 2008 5:55 am
